Centro

miércoles, 31 de mayo de 2017

Maio de Letras Galegas: Os nenos da varíola

Un fito da medicina convertido en adictiva novela xuvenil de aventuras que combina varias tramas con gran eficacia.
Canal Lector

Corre o ano 1803 e os nenos do hospicio da Coruña reciben unha visita que cambiará a súa vida: o doutor Balmis. María Solar novela a Real Expedición Filantrópica da Vacina dirixida polo alacantino Francisco Javier de Balmis y Berenguer.  Por certo, esta expedición foi tamén levada á pantalla da man de Miguel Bardem nunha produción para televisión


Para saber máis sobre a novela:
Para saber máis sobre a Expedición Balmis:
Deixámosvos un vídeo da serie Historias de Galicia da TVG na que se nos lembra ao doutor betanceiro Posse Roibanes, o home que trouxo a primeira vacina a Galicia e que colaborou con Balmis na preparación da expedición.

martes, 30 de mayo de 2017

Maio de Letras Galegas: A soidade das medusas

Recomendo vivamente A soidade das medusas. Un libro construído, paréceme, cos fíos da vida como afirmaba Fernández Paz. Sen dúbida, un paso adiante dunha voz nova que cómpre non deixar pasar desapercibida.
Ramón Nicolas

Iria Collazo, a que algúns e algunhas de vós coñecedes pola novela Coma unha áncora, preséntanos neste seu novo libro, A soidade das medusas, un feixe de relatos que xiran arredor da soidade acompañados das suxestivas ilustracións de Luz Beloso.


As medusas ficaban nun daqueles recipientes de cristal, vivas pero ausentes, ignorantes da beleza que emanaban e da súa inexorable soidade.
Iria Collazo, "Sweet child of mine" en A soidade das medusas

Para saber máis:

lunes, 29 de mayo de 2017

Maio de Letras Galegas: Cancións para desafinar da Gramola Gominola

Gústanos moito a colección Sonárbore de Galaxia que nos vén de sorprender cun novo libro-CD: Cancións para desafinar do grupo de rock de música infantil en galego Gramola Gominola.


Deixámosvos o booktrailer do seu anterior libro-CD.


viernes, 26 de mayo de 2017

IV Carreira Popular de San Sadurniño e un libro moi especial

Máis algo permanecía igual: correr. Era a súa forma de comunicarse. Cada día máis. Cada día empurrando o seu corpo magro a través do vento do cronómetro segundo a segundo, décima a décima.
María Reimondez, Corredora

María Reimóndez vén de publicar Corredora. A novela conta a vida de Genet, unha mociña etiope que verá mudar a súa vida por mor da súa afección a correr. 


E falando de correr, lembrade que este domingo terá lugar a a IV Carreira Popular de San Sadurniño.


jueves, 25 de mayo de 2017

Maio de Letras Galegas: A casa do medo

Onte regresei a Valverde, a vila onde transcorreron os primeiros doce anos da miña vida.
Agustín Fernández Paz, A casa do medo

Así comeza a derradeira e póstuma novela de Agustín Fernández Paz: co regreso á vila natal do protagonista que é o lugar no que se atopa aquela misteriosa cabana que tanto o asustaba de pequeno... A casa do medo é unha novela breve, cun ritmo narrativo áxil na que se mestura misterio e fantasía.


Preme aquí se queres ler o primeiro capítulo.

martes, 23 de mayo de 2017

Maio de Letras Galegas: Rosalía de Castro e Mª Victoria Moreno


A editorial Urco inaugurou hai unha temporadiña unha nova colección titulada "Mulleres bravas da nosa historia". Polo momento contamos con dous títulos: Rosalía de Castro de María Lado e Mª Victoria Moreno de Eli Ríos.


Para saber máis:

lunes, 22 de mayo de 2017

Maio de Letras Galegas: Terra de Xurxo Mariño

Ao longo da nosa vida, moi poucas veces nos paramos a pensar, a reflexionar en serio. O estilo de vida occidental fomenta a dispersión mental e as distraccións constantes, co estrés, as redes sociais… Pero cando estás cinco días no deserto de Kalahari, e ves as Nubes de Magalláns e pensas que iso nunca se ve en Europa, a cabeza despéxase e fas reflexións que non farías doutro xeito.
Xurxo Mariño, Entrevista en GCiencia

O neurocientífico Xurxo Mariño cóntanos en Terra, libro  que forma parte da nova colección Básicos Ciencia da editorial Xerais, a súa viaxe de once meses arredor do mundo. Deixámosvos un vídeo, que moitos de vós coñecedes, que nos achega a este marabilloso periplo polo mundo que agora xa podedes atopar escrito.



                
Para saber máis:

viernes, 19 de mayo de 2017

Chea de vida

A pasada semana parte do alumnado do noso centro formou parte dun proxecto moi especial: un coro dirixido por Ramón Bermejo e composto por mil alumnos e alumnas de dezasete centros educativos da comarca de Ferrolterra. O coro e Guadi Gallego interpretaron a canción "Chea de vida"  nos estaleiros de Navantia. Moitos parabéns ao alumnado e aos organizadores e organizadoras! 




                  
Preme aquí para acceder a máis información na web do nosos centro.

martes, 16 de mayo de 2017

Maio de Casares VI: Carlos Casares. Vida e literatura

 
A cuestión da tolerancia era un asunto crucial para Casares.
Damián Villalaín: Carlos Casares. Vida e literatura

Damián Villalaín achéganos a figura do autor homenaxeado este ano no Día das Letras Galegas co seu libro Carlos Casares. Vida e literatura


lunes, 15 de mayo de 2017

Maio de Casares V: Carlos Casares

Unha aproximación breve e rigoroso á figura de Carlos Casares escrita por Ramón Loureiro quen afirma sobre o escritor de Xinzo:
O proxecto de Casares nunca se chamou Carlos: chamábase, e chámase, Galicia. Esa Galicia á que el xamais quixo medir polas raias dos mapas, senón pola grandeza dos corazóns, e da que co seu exemplo fixo, para toda unha xeración e para o futuro, unha razón de existir.
Ramón Loureiro, Carlos Casares


Amadriñamentos e apadriñamentos lectores

Atoparedes na nosa web o vídeo da emocionante xornada dos amadriñamentos e apadriñamentos lectores celebrada o pasado 23 de abril. Premede aquí para velo.

viernes, 12 de mayo de 2017

Maio de Carlos Casares IV: A ferida do vento

Hai nos seus xestos lentos unha especie de cansazo, talvez produto da súa actitude reflexiva
Antón Riveiro Coello, A ferida do vento

A ferida do vento de Antón Riveiro Coello trasládanos ao ano 1978 cando Antón, o protagonista, volve a Xinzo de Limia despois de pasar tres meses no internado. É unha novela de formación que relata o paso da infancia á adolescencia e nos ofrece unha vívida estampa da vila ourensa e dos seus personaxes memorables, entre os que non podía faltar, por suposto, Carlos Casares.


Para saber máis sobre a novela:

jueves, 11 de mayo de 2017

martes, 9 de mayo de 2017

Empezando o maio de Carlos Casares

O Día das Letras Galegas está dedicado este ano ao escritor Carlos Casares. As iniciativas e actividades sobre el empezaron xa hai unha temporadiña e nós hoxe queremos facernos eco hoxe dunha moi especial: Primavera das Letras. Trátase dunha web elaborada pola RAG (Real Academia Galega) que inclúe unha biografía, fichas didácticas e numerosos recursos. Preme aquí se desexas coñecela.


viernes, 5 de mayo de 2017

Unha nova ferramenta para acceder ao catálogo documental da RAG na rede

A RAG (Real Academia Galega) ofrece un novo servizo en liña que,  segundo podemos ler na súa web, permite acceder aos catálogos de máis de trinta arquivos de distintas institucións galegas e a case 3750 copias dixitais de diversos documentos destas. Preme aquí para acceder a esta útil ferramenta.

jueves, 4 de mayo de 2017

Unha interesante ferramenta

O INE (Instituto Nacional de Estatística) ofrécenos unha interesante ferramenta para coñecer a evolución da poboación dende o ano 2000. Preme aquí se desexas coñecela.

miércoles, 3 de mayo de 2017

Recortando a Cervantes

Recortando a Cervantes é unha proposta impulsada pola Fundación Festival Internacional Teatro Clásico de Almagro coa que  colaboran Leer.es e a Biblioteca Virtual Miguel de Cervantes.  Está formada por dez recursos educativos, elaborados a partir das ilustracións do debuxante Fernando Vicente,  que xiran arredor dos personaxes máis significativos das obras de Cervantes.


Preme aquí se queres coñecer esta interesante iniciativa.