Centro

viernes, 30 de diciembre de 2016

miércoles, 21 de diciembre de 2016

Este Nadal lemos a... Roald Dahl

Este Nadal escollemos coma protagonista da nosa guía de suxestións a Roald Dahl. Agardamos que vos guste.


https://issuu.com/sansaliber/docs/compressed-roald

Galicia 100: unha apaixonante viaxe pola historia

Galicia 100 é o nome dunha exposición que presenta cen pezas da historia de Galicia. Esta apaixonante viaxe a través da historia pódese visitar ata o vindeiro 7 de xaneiro na sede de Afundación en A Coruña e a partir deste mes ata abril en Vigo.


Preme aquí para coñecer máis sobre esta interesante iniciativa e coñecer todas as pezas.

lunes, 19 de diciembre de 2016

viernes, 16 de diciembre de 2016

E seguimos con Valle-Inclán

Hoxe lembramos a don Ramón cun documental producido polo Consello da Cultura Galega que acompaña á exposición Outros verbos, novas lecturas: Valle-Inclán traducido.
 

jueves, 15 de diciembre de 2016

Admunsen e Manuel Antonio

Roald Admunsen desapareceu o 18 de xuño de 1928 mentres voaba en avión nunha operación de rescate do enxeñeiro e explorador italiano Umberto Nobile. O poeta rianxeiro Manuel Antonio dedicoulle unha sentida elexía que comeza cuns coñecidos versos do norteamericano Walt Whitman.


Elexía ao capitán Roald Admunsen
que se perdeu no Polo Norte
Oh captain! My captain!
Walt Whitman
PAISAXE
Ninguén pudo atopar entre a neve
eses beizos xeados
que se lle perderon ao silencio
E as lonxedades
ceibes
descinguiron a soedade
No remuíño
da derradeira rafega de vento
foise toda espranza
e o sol apagado
Ningunha voz poderá destemerse
sin caer morta aos pés da neve
coma un paxaro novo
Oh capitán! Meu capitán!
Manuel Antonio

miércoles, 14 de diciembre de 2016

E Admunsen logrouno

En estas regiones, uno pierde la costumbre de las ceremonias largas. Cuanto más cortas, mejor."
Roald Admunsen


Un 14 de decembro de 1911 a expedición dirixida polo noruegués Roald Admunsen alcanzaba o Polo Sur, tal e coma nos lembra o doodle de Google. Había dous anos que el e o explorador británico Robert Falcon Scott empezaran os preparativos para seren os primeiros en lograr esta fazaña. Mais a sorte favoreceu (nesta ocasión) ao noruegués,  xa que Scott chegou 34 días máis tarde falecendo á volta.
 
Créditos da fotografía aquí.

martes, 13 de diciembre de 2016

A beleza do Universo

Un pouco máis tarde do previsto, xa que habitualmente adoitamos publicar as nosas guías de suxestións de ciencia en novembro, presentámosvos A beleza do Universo. Premede na imaxe se queredes coñecer esta nosa nova guía.


https://issuu.com/sansaliber/docs/bioloxia

lunes, 12 de diciembre de 2016

Sempre, o gran don Ramón

e por fin o gran Don Ramón
Castelao, Alba de gloria

Pois si, o gran Don Ramón ao que se refire Castelao, no seu discurso Alba de gloria, non é outro que Ramón María del Valle-Inclán o grande escritor nacido en Vilanova de Arousa o 28 de outubro de 1866 e falecido en Santiago de Compostela o 5 de xaneiro de 1936. E nós, non podiamos deixar de lembralo neste ano no que se conmemora o 150 aniversario do seu nacemento.
Don Ramón foi narrador, dramaturgo e poeta. En certo sentido, incluso se pode afirmar que fixo da súa vida unha lenda... Unha lenda fiel a aquilo que escribiu:
"Lo mismo da triunfar que hacer gloria de la derrota".

Foi autor dunha extensa obra na que destaca a poesía e o teatro, pero na que non se pode esquecer a poesía ou os artigos xornalísticos. Mais, don Ramón, foi e será coñecido por crear o esperpento, unha estética nova na que o cómico e o serio se mesturan e na que os personaxes son caricaturizados e a realidade satirizada. Unha estética, que alcanza o seu punto máximo de esplendor en Luces de bohemia, unha obra teatral que apareceu publicada en entregas semanais na revista España en 1920 e que en 1924 se editou en libro. E sabes o máis curioso: non se estreou en España ata o ano 1970!
Para saber máis:

viernes, 9 de diciembre de 2016

E na biblioteca... arte II. Mulleres do silencio

Coñecemos, a través de Cultura Galega, unha interesante exposición no MARCO, Museo de Arte Contemporánea de Vigo: Mulleres do silencio.

Este proxecto, que reúne preto dun centenar de obras,  percorre diferentes xeracións de artistas ata a actualidade. Rosario Sarmiento, comisaria da exposición, escribe no texto curatorial desta:

A historia da arte occidental foi construíndo durante séculos os seus propios códigos, favorecendo o protagonismo da figura do creador masculino e excluíndo as mulleres dos principais movementos que conforman a historia da arte occidental. Esta visión da historia da arte como un discurso parcial e nesgado foi investigada por historiadoras como Linda Nochlin que en 1971, no xa considerado texto fundacional da crítica artística feminista, se preguntaba "Por que non houbo ao longo da historia grandes mulleres artistas?". Con iso non facía máis que formular no territorio artístico unha cuestión que se podía aplicar a calquera outro ámbito social ou cultural. A inexistencia de mulleres artistas non era consecuencia da súa propia natureza, senón do papel que ao longo da historia lle asignara a sociedade. Deste xeito, será a partir dos anos setenta do pasado século cando se inicie a construción/reconstrución dunha historia paralela que poñía en tea de xuízo a propia historia da arte e a súa valoración do traballo das mulleres artistas, relegadas a ser simples obxectos en lugar de suxeitos activos. 
Rosario Sarmiento

miércoles, 7 de diciembre de 2016

AulaCorto

AulaCorto é un portal de cinema para centros docentes cuxo obxectivo é ofrecer á comunidade educativa unha selección de  30 curtametraxes  a partir dos que traballar nas aulas.

lunes, 5 de diciembre de 2016

Youtubeir@s

Coñecemos a través de Cultura Galega unha interesante iniciativa para incrementar o número de vídeos en galego na rede: Youtubeir@s.

viernes, 2 de diciembre de 2016

Todo o tempo do mundo

E así ía lendo o mundo coma se lese un libro, ou fose lendo unha rúa da vila. Sempre me gustou ler as rúas, foi o que máis me gustou de aprender a ler: ler as rúas, os carteis dos comercios, mil cousas. Pero ninguén me ensinara a escoitar.
David Pérez Iglesias, Todo o tempo do mundo

E Ariadna aprenderá a escoitar da man do seu avó nesta novela de David Pérez Iglesias (responsable da canle de vídeos SonCine) con ilustracións de Marcos Viso. Pero, deixemos que sexa o seu autor o que nos presente a obra coa que, por certo, gañou a XXXI edición do Premio Merlín de Literatura Infantil:

«Un libro é un camiño. Desexar que o camiño non remate, que te acolla e chame polo mellor de ti. Verte ensarillado nos camiños que outros andaron. Repousar nas encrucilladas coas outras historias. Porque ese é o noso relato e a nosa herdanza. O que di que estivemos aquí, e que o noso estar aquí tivo desexo e sentido, que non nos acovardamos, que andamos o treito que tocou, e que o camiño segue despois de nós.»
 
«Se da man destas palabras algunha meniña á volta da escola, ou algún patrón canso, ou unha traballadora alertada polas inseguridades da vida, comparten a emoción do encontro coa terra, a valentía da infancia, a convicción do que é xusto, a dignidade da palabra, a aperta confiada do idioma que nos deron, a nobreza da necesidade, eu terei feita a miña labor.»

 «Todo o Tempo do Mundo é unha novela sobre a perda e o descubrimento. Unha nena que volve á aldea dos seus pais, onde xa só vive un avó que apenas coñece. Unha aldea no límite da desaparición, ameazada polas canteiras e o despoboamento. Nela cada xesto cotián ten a reverberación do único, do esencial. Da man do seu avó Valente, Ariadna abre os ollos a un mundo que é por ultima vez e a unha maneira de camiñar pola vida que durará sempre.» 


miércoles, 30 de noviembre de 2016

¡Fútbol! Mucho más que un juego

El fútbol nos sirve para enseñar valores a nuestros niños y jóvenes, que aprenden a jugar en equipo y a compartir responsabilidades y esfuerzos.
Vicente del Bosque 

¡Fútbol! Mucho más que un juego é un libro escrito polo sociólogo arxentino Pablo Nacah. María Pascual é a ilustradora deste libro que nos invita a coñecer as orixes e a historia do fútbol, ao mesmo tempo que nos proporciona prácticos consellos para practicalo.

La vida es juego y el fútbol es amistad: esta es la hipótesis principal que ¡Fútbol! Mucho más que un juego invita a considerar a sus jóvenes lectores y lectoras. (...)
Se encienden las luces del estadio, los lápices para subrayar ya están preparados, la pelota bajo la suela del pie... ¡a disfrutar del juego de leer!

Pablo Nacah

martes, 29 de noviembre de 2016

Novembro, mes da Ciencia en Galego nas Bibliotecas VI: De vacalouras e escornabaois

Por sobre do soutelo había unha carballeira; entre os dous bosques un regueiro estreito. A carballeira era o reino ciclópeo e salvaxe das vacalouras.
Méndez Ferrín, "Grieih"
 

Atopamos en GCiencia, unha das nosas webs de divulgación científica preferidas, unha nova preocupante sobre as vacalouras ou escornabois (Lucanus cervus) que se titula "A vacaloura, unha icona galega en perigo". O certo é que tal e coma nos lembran no artigo, o Lucanus cervus, chamado en castelán "ciervo volante", tivo unha gran presenza na cultura popular galega, foi coprotagonista dun conto de Méndez Ferrín titulado "Grieih" (Percival e outras historias) e ata dunha canción do Xabarín Club! 


lunes, 28 de noviembre de 2016

Novembro Mes da Ciencia en Galego nas Bibliotecas Escolares V: Vivir no solo

Pois si, moita xente cre que é necesario salvar as baleas ou os carballos pero non movería un dedo polo solo. 
Vivir no solo

Esta é unha das reflexións da lombriga ou miñoca (Lumbricus terrestris) protagonista do cómic Vivir no solo que, segundo lemos no xornal La Voz de Galicia, vén de traducirse ao italiano, despois de ter sido traducido ao castelán, o catalán e o inglés. Un verdadeiro éxito para unha obra con texto de Marilar Aleixandre e ilustracións de Francisco Bueno que naceu no ano 2000 para sensibilizar á cidadanía sobre a necesidade de protexer o solo.

Preme aquí se queres lelo e lembra que na bilioteca temos un exemplar impreso.

miércoles, 23 de noviembre de 2016

Novembro Mes da Ciencia en Galego nas Bibliotecas IV: Efervesciencia

Efervesciencia é un programa de divulgación científica emitido pola Radio Galega os domingos de 15:00 a 16:00. Preme aquí se queres acceder aos podcasts deste interesante espazo radiofónico.

martes, 22 de noviembre de 2016

Novembro de Ciencia IV: Ano Internacional dos Legumes



A Asemblea Xeral das Nacións Unidas proclamou (no seu 68ª período de sesións) o ano 2016 Ano Internacional dos Legumes co fin de sensibilizar á cidadanía sobre vantaxes nutricionais destes como parte dunha produción de alimentos sustentable encamiñada a lograr a seguridade alimentaria e a nutrición.
Para saber máis:
               
Vídeo atopado aquí

jueves, 17 de noviembre de 2016

Novembro Mes da Ciencia en Galego nas Bibliotecas Escolares III: Cruz Gallástegui


Cruz Ángel Gallástegui Unamuno naceu en Bergara en 1891 e faleceu en Pontevedra en 1960. Gallástegui, afincado en Galicia dende 1921, foi un enxeñeiro agrónomo e veterinario que se converteu nun dos pioneiros en experimentar con híbridos do millo en Europa e nun modernizador da agricultura galega.
Para saber máis:

miércoles, 16 de noviembre de 2016

Lembrando a Narf

Só tambor ecoando como a canção da força e da vida
Só tambor noite e dia
dia e noite só tambor
José Craveirinha
 
Estes días estannos deixando moitas novas tristes relacionadas co música, posto que onte enterámonos da nova do falecemento do músico Fran Pérez, Narf. O seu derradeiro disco, en colaboración coa cantante Uxía, chamáse Baladas da Galiza imaxinaria. Nel inclúese unha versión da "Cantiga do neno da tenda", un dos Sete poemas galegos de García Lorca. Nós queremos homenaxelo cun vídeo no que interpreta outro dos sete poemas que o escritor andaluz, ao que tanto admiraba tamén Cohen, escribiu en galego: "Madrigal á cibdá de Compostela".

               

 Para saber máis:

A nosa sorpresa lectora de medo


O pasado xoves 27 de outubro un grupo de alumnos e alumnas de 1º de ESO xuntouse na biblioteca para ler un conto de medo moi especial: "Noites de lúa chea" do libro Contos por palabras de Agustín Fernández Paz.
Grazas pola súa participación.


martes, 15 de noviembre de 2016

Día do Peón

O pasado venres 11 o noso centro celebrou o Día do Peón seguindo a convocatoria de Brinquedia. Na nosa web poderás atopar máis información sobre este evento.


lunes, 14 de noviembre de 2016

Leonard, o home que escoita os segredos acordes

Now I've heard there was a secret chord
Leonard Cohen

A pasada semana chegounos a nova do falecemento do escritor e cantautor canadense Leonard Cohen. Empezou a escribir cando era moi novo amosando a súa paixón por Lorca e Walt Whitmann  e facéndose coñecido coma escritor no seu Montreal natal e no resto do Canada. Co paso dos anos foise centrando máis na música e compoñendo cancións, que cantaba coa súa voz rouca tan especial, nas que as referencias místicas, o amor e a influencia surrealista se mesturaban para conseguir acadar ese punto na que canción e poesía se fusionan de maneira sorprendente.
Unha das súas cancións máis coñecidas é "Hallellujah" que, versionada por Rufus Wainwright, formou parte da banda sonora de Shrek. En 1986 Cohen incluiu no seu disco I'm Your Man unha canción titulada "Take this waltz". Tratábase dunha versión do poema de Lorca "Pequeño vals vienés" publicado no libro Poeta en Nueva York. Se ben, a canción xa se incluirá anteriormente noutro disco que homenaxeaba a Lorca e no que participaron numerosos cantantes: Poetas en Nueva York.




Para saber máis:
 So long, Leonard Cohen.

lunes, 7 de noviembre de 2016

Novembro de Ciencia III: VI Concurso Científico

Xa podedes atopar na nosa web as bases para participar no noso VI Concurso Científico Investigación e Ciencia. Trátase dunha actividade, organizada polo departamento de Física e Química e a biblioteca escolar, que está dirixida ao alumnado de secundaria do noso centro.

Anímate e participa!

jueves, 3 de noviembre de 2016

Novembro, Mes da Ciencia en Galego nas Bibliotecas

 Hoxe vivimos en Galicia, e dende Galicia vivimos no mundo
Isabel Aguirre de Urcola

Un ano máis chega novembro e a ciencia vólvese a protagonista deste mes nas bibliotecas galegas cunha conmemoración que pretende apoiar a presenza da divulgación científica nas bibliotecas: Novembro, mes da ciencia en Galego nas Bibliotecas. Trátase dunha iniciativa conxunta da Secretaría Xeral de Cultura (Subdirección de Bibliotecas), a Secretaría Xeral de Política Lingüística e a Dirección Xeral de Centros e Recursos Humanos (Asesoría de Bibliotecas Escolares), da Consellería de Cultura, Educación e Ordenación Universitaria.
A arquitecta Isabel Aguirre de Úrcola foi a científica convidada para a elaboración do "Manifesto" desta data.

lunes, 31 de octubre de 2016

Samaín e calacús

O Portal das Palabras, unha iniciativa da RAG e a Fundación Barrié,  achéganos ao Samaín:

Halloween, Samaín ou Todos os Santos, as celebracións arredor do primeiro de novembro veñen de antigo e chegan ata nós máis ou menos transformadas. Na súa versión máis profana ou xa cristianizadas, todas teñen unha orixe común nas culturas indoeuropeas, que festexaban arredor desta data a fin do verán e, con iso, o comezo dun novo ciclo agrícola e tamén dun novo ano, que nacía coa estación escura. Neses días de transición, os espíritos dos mortos andarían entre os vivos, mellor ou peor recibidos. E desa crenza precisamente derivan moitos dos ritos que se manteñen aínda hoxe.

 Para saber máis:

viernes, 28 de octubre de 2016

A boca do monte e o Samaín

Celia Díaz Nuñez vén de publicar hai uns meses a novela A boca do monte (Galaxia). Historia, aventuras, amor, fantasía e ficción combínanse nunha narración cun ritmo narrativo áxil que nos permite viaxar á Gallaecia romana e coñecer as orixes do túnel de Montefurado (tamén chamado a Boca do Monte).


Por certo, así nos describe Celia Díaz a celebración do Samaín na novela:

A lúa chea marcou o inicio do Ano Novo, o comezo da Estación Escura e o remate da Luminosa. O momento en que a Terra se encolle e se aletarga ata o renacer da primavera. Nesa data celebraron a festa do Samaín, o momento en que a porta do Outro Mundo está aberta, desaparece a barreira entre os dous mundos e os espíritos dos defuntos camiñan de par dos vivos. Os devanceiros mortos regresan do Alén para visitar os seus fogares.
Para guialos no seu camiño baleiraron carolas de nabos, introducindo no interior brasas acesas e colocáronas diante das cabanas.
Celia Díaz Nuñez, A boca do monte


jueves, 27 de octubre de 2016

Lecturas de medo

O alumnado de Infantil e Primaria participou nas "Lecturas de medo", unha actividade xa "tradicional" no noso centro nestas datas. Preme aquí se queres coñecer máis sobre esta actividade.


E, por certo, o alumnado de secundaria lembrade que hoxe no recreo temos prevista a lectura dun conto de medo moi especial... Unha sorpresa para pasalo de medo co medo.

martes, 25 de octubre de 2016

Wikitongues

Wikitongues é unha canle de You Tube que publica vídeos nas diversas linguas do mundo co fin de dar a coñecer e preservar a riqueza lingüística.

lunes, 24 de octubre de 2016

Mes das Bibliotecas Escolares e Día da Biblioteca

  Hai que recoñecer que son únicos custodiando tesouros. Extraterrestres co corazón vermello e brillante. Que cousa tan fantástica. Feliz Día das Bibliotecas!
Ledicia Costas
A piques de rematar este noso mes, o das Bibliotecas Escolares, queremos lembrar que hoxe se conmemora o Día da Biblioteca.

Co gallo desta celebración (unha iniciativa da Asociación Española de Amigos del Libro Infantil y Juvenil en colaboración co Ministerio de de Educación, Cultura e Deporte) encárgase a un escritor ou escritora e a un ilustrador ou ilustradora a redacción dun pregón e a elaboración dun cartel. Este ano as autoras seleccionadas son Ledicia Costas e Elena Odriozola, Premio Nacional de Literatura Infantil e Ilustración 2015.

Aquí tedes é o pregón de Ledicia Costas, na súa versión en galego, que atopamos no blogue de Gálix:

Un vagalume é unha illa diminuta extraviada na noite máis densa. Cen vagalumes, unha constelación misteriosa que marca o rumbo cara a outros universos. Así, con esa estratexia de luz, organízanse os libros que moran nas bibliotecas. Son aloumiños fosforescentes que incendian os soños e recompoñen os corazóns grises ata facelos recobrar o seu vermello brillante. Calquera individuo que padeza a síndrome do corazón gris, debería poñerse en mans dun experto e visitar unha biblioteca.

Para escribir un libro, ademais de facer malabarismos coas palabras hai que ser unha desvergonzada ou un tolo. Un atrevido, unha excéntrica descontrolada! Levar un calcetín de lunares, outro de raias e os pelos de punta. Unha crista como as das cacatúas sería un peiteado ben interesante para un escritor. Só as mentes máis disparatadas son aptas para escribir libros. Mais para custodialos non chega con ter un desaxuste nos cables cerebrais. É indispensable ser de fóra. Un extraterrestre. As bibliotecas albergan seres con antenas xiratorias, cerebros milliométricos que memorizan títulos rebuscados, rimbombantes, campanudos. As persoas que custodian os libros sempre me pareceron criaturas singulares. Están dotadas de extremidades retráctiles que estiran e estiran ata alcanzar aquel volume ao que semellaba imposible acceder. E logo, coma se nada, recompóñense e todo volve á súa posición natural. Semellan seres humanos, mais a pouco que os observes, percibirás que non son de aquí. Unha das cousas que máis me fascina é o seu cerebro. Parécenme tan listos! Os libros fabrican pensamentos. Pasar tantas horas dentro dunha factoría de ideas é bo para ter un corazón vermello e brillante e unha cabeza chea de plans fantásticos.

Alguén me contou que o 24 de outubro é o Día das Bibliotecas. Sería xenial montar unha festa con confeti e pompas de xabón. Unha cousa grande. A min encantaríame vestirme para tal ocasión coma o personaxe dalgún libro, sentar na mesa dunha biblioteca da cidade onde vivo, e agardar a que viñesen visitarme. Nas bibliotecas podes ser quen ti queiras. Desde Mary Poppins ata Matilda. Atreyu, Drácula e ata Pippilotta Viktualia Rullgardina Krusmynta Efraimsdotter Långstrump. Podes poñer botas de pelo, plumas, zancos e sombreiros. Sombreiros! Iso é! Imaxino a unha pequena lectora achegándose a min discretamente, engaiolada polas cores e formas do meu chapeu:

—Sombrereira tola, que festa tan marabillosa! Sería tan amable de servirme unha taza de té?

Eu serviríalla con moito gusto, poñendo cara de muller refinada, e logo as dúas faríamos a un tempo ruído ao tragar. Soaría algo así como glup glup glup. E antes de que nos dese tempo de botarnos a rir de xeito desenfreado, aparecería o bibliotecario, como xurdido da nada, que para iso posúen a facultade de materializarse diante de ti no momento máis inoportuno, e nos advertiría de que as bibliotecas non son lugares aptos para ir merendar. Hai que recoñecer que son únicos custodiando tesouros. Extraterrestres co corazón vermello e brillante. Que cousa tan fantástica. Feliz Día das Bibliotecas!

Feliz Día da Biblioteca!

viernes, 21 de octubre de 2016

E na biblioteca... arte I

Este curso, como xa sabedes, Biblioteca Escolar-Territorio das Artes é  o lema escollido para os carteis e outros materiais que a Consellería de Cultura, Educación e Ordenación Universitaria edita con destino ás bibliotecas escolares.

Nós queremos que a arte, que sempre tivo o seu lugar na nosa biblioteca e neste blogue, sexa un dos eixos da nosa actividade, polo que hoxe comezamos lembrando unha exposición sobre o Mestre Mateo que se poderá visitar no Museo del Prado a partir do 29 de novembro e da que vimos de ter noticia grazas á web Culturagalega.org..
Por certo, deixámosvos un interesante vídeo sobre a restauración da obra cimeira do Mestre Mateo: o Pórtico da Gloria na Catedral de Santiago de Compostela.

martes, 18 de octubre de 2016

Sempre Delibes

La novela es un hombre, un paisaje y una pasión.
Miguel Delibes 

Onte cumpríronse 96 anos do nacemento do escritor Miguel Delibes. Co gallo desta data celebráronse numerosas actividades tal e coma podiamos ler en El norte de Castilla, xornal ao que el estivo moi vinculado.


Para saber máis:


lunes, 17 de octubre de 2016

O Papagaio

O Papagaio é un xornal mensual en galego (editado en papel e dirixido aos rapaces e rapazas de Primaria e Secundaria) que vén de nacer. Inclúe temas de actualidade, ciencia, tecnoloxía, arte, banda deseñada... O primeiro número está dispoñible na rede.


viernes, 14 de octubre de 2016

Héctor Cajaraville: Premio Meiga Moira 2016

Coñecemos a través de Culturagalega.org a concesión do Premio Meiga Moira de Literatura Infantil e Xuvenil 2016 a Héctor Cajaraville pola súa novela Denébola a Roxa. O xurado manifestou que Denébola a Roxa "é unha novela de aventuras de estrutura áxil e dinámica, ambientada no século XVII que relata o desafío dunha muller afouta nun mundo de homes".

Agardamos ler a novela pronto!

jueves, 13 de octubre de 2016

Bob Dylan: Forever Young

Forever young, forever young,
may you stay forever young.
Bob Dylan

O cantautor norteamericano Bob Dylan vén de recibir o Premio Nobel de Literatura 2016. Ao coñecer a nova viñeron tantas cancións á cabeza que ao principio se nos facía difícil escoller algunha. Despois, pensamos nunha, que lle dedicou ao seu fillo máis vello, na que amosa a súa capacidade de dicir o esencial con poucas palabras. Unha canción fermosa e simple: "Forever Young".

                
Para saber máis:

lunes, 10 de octubre de 2016

Jane Austen

Los trocitos de marfil (de dos pulgadas de ancho) en los que trabajo con un diminuto pincel
Carta de Jane Austen ao seu sobriño James Edward 


Austen, unha das grandes escritoras inglesas de todas as épocas, naceu na rectoría de Steventon (Hampshire) en 1775. En 1811 publicou, de forma anónima, a súa primeira novela, Sentido e sensiblidade. Nesta xa se aprecian algunhas das características fundamentais da súa obra narrativa: habilidade na descrición psicolóxica dos personaxes e do seu ambiente social, escasa importancia da intriga, ironía...


Dende entón ata a súa morte, en 1817, publicou seis novelas máis: Orgullo y prejuicio, Mansfield Park, Emma, La abadía de Northanger e Persuasión.

Para saber máis:

viernes, 7 de octubre de 2016

La buena vida

La buena vida é o título dunha guía, elaborada polo INGADA (Instituto Gallego del Déficit de Atención y trastornos asociados) coa colaboración da Consellería de Sanidade, para o fomento de hábitos saudables a través combinación de alimentación e exercicio físico.


lunes, 3 de octubre de 2016

viernes, 30 de septiembre de 2016

Lembrando a Buero Vallejo


«El teatro es mi realización y mi vida... Cuando Buero deje de existir ya no quedará más que su obra y Buero será su obra».
Antonio Buero Vallejo
Onte cumpríronse cen anos do nacemento do dramaturgo Antonio Buero Vallejo (1916-2000). A súa longa traxectoria dramática, que inaugurou en 1949 co estreo de Historia de una escalera, presenta unha visión do mundo profundamente humanista na que o simbolismo ten un importante papel.

miércoles, 28 de septiembre de 2016

Unha selección de lecturas para empezar un novo curso

Atopamos en Canal Lector unha interesante selección de lecturas titulada "Un curso por delante". Por certo, nós tamén publicamos no Nadal de 2013 unha guía de suxestións para o alumnado de secundaria que titulamos " Literatura, cine e educación". 

Felices lecturas e xa sabedes: atoparédesnos onde o mundo se chama biblioteca.

martes, 27 de septiembre de 2016

viernes, 23 de septiembre de 2016

A lectura, chave do futuro

Atopamos no blogue Rede Lectura información sobre unha interesante guía dixital sobre a lectura: A lectura, chave do futuro.


Ola... de novo

Un curso máis estamos de volta no blogue da biblioteca: benvidas e benvidos. Queremos empezar lembrando o cartel que a Asesoría de Bibliotecas Escolares elaborou para este vindeiro curso co lema "Biblioteca escolar-Territorio das Artes". Por certo, a imaxe foi creada pola ilustradora pontevedresa Minia Regos.

E coma sempre: agardámosvos onde o mundo se chama biblioteca!

martes, 12 de julio de 2016

Agustín Fernández Paz: o home que coñecía a maxia das palabras e os fíos da memoria

Quizais as persoas esteamos feitas de recordos, quizais a nosa vida se asemelle a un pano tecido cos fíos da memoria, os mesmos que utilizo para construír as miñas novelas.
Agustín Fernández Paz, O rastro que deixamos
 
A mañá de hoxe tróuxonos unha triste nova: o falecemento do escritor Agustín Fernández Paz. Queremos lembrar a Agustín cuns anacos dun fermoso texto que escribiu para a conmemoración do Día Internacional do Libro Infantil e Xuvenil e cun vídeo no que se recolle unha exposición  realizada na Biblioteca Agustín Fernández Paz do Instituto Basanta Silva de Vilalba (vila naquel naceu en 1947).


Un mundo de palabras

    Cando eu era neno, tiña na miña cama unha colcha feita con retallos de teas de diferentes texturas e cores: unha colcha de trapos. Lémbroa agora, despois de tantos anos, e volvo escoitar o estrondo das ondas e o ruído do vento nas velas, e sinto medo porque me atopo nunha selva chea de perigos, e contemplo abraiado un espacio lunar ateigado de silencios... Porque a miña memoria se enche cos mundos encerrados nos libros que había na pequena biblioteca de meu pai, aqueles libros que, coas mans aterecidas, eu lía con paixón nas noites de inverno da miña infancia, abrigado pola colcha de trapos que fixera miña nai.
    A min gustábame moito contemplar aquela colcha, imaxinar que a súa superficie era como un inmenso territorio, un gran continente con múltiples países, tan diversos e atraentes coma os debuxos e as cores das teas que a formaban. E por eses países soñados, polas súas selvas e cidades, polos seus montes, ríos ou desertos, facía eu vivir as personaxes que nacían da miña imaxinación, alimentada decote polas palabras gardadas naqueles libros inesquecibles.
    Estas lembranzas veñen á miña memoria mentres contemplo o globo terráqueo que a miña filla ten no seu cuarto, iluminado por un sol interior que o fai brillar na penumbra. E penso entón que o mundo é coma a colcha da miña cama de neno: un mosaico de cores, un inmenso puzzle de países e culturas, onde todas as pezas, grandes ou pequenas, son imprescindibles.
    Coma na colcha que gardo na miña memoria, coma no globo terráqueo que acompaña os soños da miña filla, tamén a diversidade está presente en todas as manifestacións da vida humana. Un mosaico de etnias, de costumes, de linguas, de xeitos de entender o mundo. Unha pluralidade que é a nosa maior riqueza.
    Quizais por iso, cando penso na variedade de linguas, nas diferentes verbas que as persoas utilizamos para nomear o mundo, volve a min o abraio dos meus anos de infancia, aquela certeza de que a través das páxinas dos libros podía coñecer o mundo enteiro. Agora sei que alí están as raíces deste pulo que me leva a crear historias e vidas no papel, empregando as palabras como únicos materiais.
    As palabras, ese milagre cotiá que nos fai humanos. Con elas aprendemos os nomes das cousas, expresamos todo o que sentimos, dámoslle vida á nosa imaxinación sen límites. E coas palabras podemos, ademais, vencer o tempo e o espacio, dialogar con persoas doutras épocas ou que están lonxe de nós. Velaí a marabilla dos libros, que nos permiten coñecer o que pensan e soñan as persoas que falan en tantas linguas diferentes.
    Algunhas noites de verán gústame tombarme na herba e contemplar o ceo que nos cobre. Sei que as estrelas que vexo escintilar no firmamento son as mesmas que viron nos tempos antigos, as mesmas que tamén fascinarán ás persoas do novo milenio que nos agarda. Un ceo amigo, que me leva a pensar nesoutro ceo de palabras e de libros que tamén comparte toda a humanidade. E sinto entón que a diversidade é o fío profundo que nos une a todas as persoas que vivimos neste vello planeta. Un planeta que é a nosa gran casa común, acubillada baixo esoutra colcha inmensa que polas noites se enche de estrelas e nos acolle a todos. 

Agustín Fernández Paz




                                              
Grazas por todo Agustín. Sit tibi terra levis.

lunes, 27 de junio de 2016

Ata logo


Calor

No vulturno acorado da sega
a ría debulla
mazorcas de sol.

O vento mareiro silenzoso chega
a durmir a sesta
no céspede mol.
Luis Amado Carballo, Proel
Hoxe despedímonos por unha tempadiña cunha lembranza moi especial para o alumnado de 4º de ESO que deixa o noso centro. Por iso, eliximos unha foto dos poemarios que elaboraron ao estilo vangardista.

Verano
Frutales
cargados.
Dorados
trigales...

Cristales
ahumados.
Quemados
jarales...

Umbría
sequía,
solano...

Paleta
completa:
verano.
Manuel Machado, Horas de oro. Devocionario poético

Feliz verán!

miércoles, 22 de junio de 2016

Preparándonos para a noite de San Xoán

Xa están aquí as cacharelas e nós querémosvos deixar un poema, do libro Os soños na gaiola de Manuel María, dedicado a esta celebración e titulado "Lume novo", que é coma se adoitaba chamar esta noite tan especial na Terra Chá.

O lume novo

Hoxe é o lume novo,
noite de San Xoán.
¡As ledas fogueiras
acesas están...!

¡Que gusto, rapaces,
saltar as fogueiras,
dar brincos, rebrincos,
e pinchacarneiras!

¡Que gusto, rapaces,
correr e saltar,
dar brincos e pulos,
volver a brincar!

¡Que gusto, que ben
saltar as fogueiras
coas chamas subindo,
medrando lixeiras!

Á mañá, o borrallo
terase apagado...
¡E sobre el despacio,
pasará o gando...!

Pasará o gando
tripando o borrallo
pra que non o pille
o mal do meigallo!


Fogueira da noite de San Xoán na praia de Skagen de P. S. Krøyer

Se che interesa saber máis sobre o pintor Peder Severin Krøyer:
 

martes, 21 de junio de 2016

Poemas birollos para ler cos ollos

Érase unha vez neste libro
un poema moi raro,
que non quería rimar.
Fran Alonso, Poemas birollos para ler cos ollos 
Atopamos en Rede Lectura nova da publicación do libro Poemas birollos para ler cos ollos de Fran Alonso. Poesía visual, oralidade e a ligazón a un videoxogo... Semella unha proposta moi atraente!