Yolanda Castaño

 O pasado mércores o alumnado de 4º de ESO asistiu á unha charla coa poeta Yolanda Castaño organizada pola Biblioteca Municipal.

Aí vén o Maio

Chega o mes de maio e con el os "maios", coma o que anda a preparar o noso EDLG. Unímonos a esa conmemoración lembrando un poema de Florencio Delgado Gurriarán sobre esta festa tradicional:

Aí vén o Maio pola porta do valado

aí vén o maio co seu traxiño branco.

(O Maio garrido, para saudar o vran,

pon luvas  de etiqueta con flores de San Xoán.

F. Delgado Gurriarán, Bebedeira

Poemas para os Maios de 2º B

 

• Poema enteiro en Son de poetas.
  
• Unha versión moi especial cantada por seis alumnos e alumnas do CEIP Julio Gurriarán do Barco de Valdeorras.

Candeloria

O pasado 2 de febreiro foi o día da Candeloria, unha festa da cultura popular con ampla presenza no refraneiro coma xa observastes coa actividade organizada polo EDLG. Unímonos a esta conmemoración cun fermoso poema de Lois Amado Carballo:

 

A CANDELORIA

   Na catedral do abrente
hoxe cásans'os paxaros,
con nubens de neve e ouro
está o ceo galanado.

   Ficou o día ancorado
na ría donda do ceo.
Os roibens soben no lonxe
como rosarios d'encenso.

   O xantar do casamento,
roibo, na palma da man
das eiras madrugadoras
xa está arranxado no val.

   Vai tocando pol-o campo
a sua zanfona o rego
e canta o vento nas farpas
sonorosas dos piñeiros.

   O campo as montanas ruzas
envolve en capa pluvial
co hisopo do sol mollado
dalles a beizón nupcial.

   Do casebre nugallán
soben os vivas dos galos
e na festa d'esta noite
estrena un luar o campo. 

Lois Amado Carballo, Proel

 

• Festas e refráns de febreiro en Meteosansa. 
• Candeloria en Meteosansa.
  

O maio de Don Ricardo XV: poesía

Antologia da poesia en galego é unha selección de poesía realizada por Paulo Fernández Mirás dos diversos libros publicados por Ricardo Carvalho Calero.

O primeiro aeroplano

ensaiaba o seu voo, ti ja o dixeches,

namentres nós nacíamos.

E o cometa Halley brillaba no ceu,

e Tolstoy se apagaba cando nós nacemos.

Ricardo Carvalho Calero, Futuro condicional

Luz Pozo Garza

«A súa presenza destilaba o mesmo que a súa poesía: delicadeza e verdade.»

Francisco Castro

Hoxe soubemos do pasamento da poeta Luz Pozo Garza. Luz naceu en Ribadeo preto do mar, dese mar sempre tan presente na súa poesía, o 21 de xullo de 1922.

Amei a mar de Vigo.

Amei a luz que modifica a doctrina dos astros

a total curvatura que da unidade ás formas

cando a badía nace cada mañá

e ti agardabas.

Foi o móbil primeiro

Luz Pozo Garza. Códice Calixtino

O páxaro na boca, Códice Calixtino, Vida secreta de Rosalía... Libros de poesía intimista no que o amor vitalista e a saudade se van sucedendo no tempo simbolizados pola luz e a sombra. 

De balde fora o devecer aquel.

A pregunta sen eco que ten forma de enigma.

Aló calara a chuvia

onde o tempo semella unha curva implacábel.

Luz Pozo Garza, Concerto de outono

 

A poesía de Luz era unha poesía tamén na que a Música tiña un importante papel. 

Aquel vello piano noite e tempo

de madeiras exóticas que cercaban a infancia

conserva a transparencia do primeiro Chopin

nun reino fuxitivo onde pasan as sombras en claves sucesivas.

Luz Pozo Garza, Códice Calixtino

Mais falar de Luz Pozo Garza é falar tamén da ensaísta, da directora da revista Nordés, da profesora que achegou a literatura a tantos alumnos e alumnas coma Manuel Rivas:

 

«Con ela chegaba unha estación nova; entraba na clase tranquilamente a primavera»

Manuel Rivas 

• Luz Pozo Garza na Biblioteva Virtual Galega.
• Luz Pozo Garza no blogue Versos e Aloumiños.
• Videoteca no Centro de Documentación de AELG.

O ar semellaba unha camelia branca

que se tornase en chuvia en sombra en pura ausencia.

Luz Pozo Garza, Códice Calixtino

Vénse de publicar...

Atopamos en Rede Lectura nova da publicación do poemario Porque te quero de Baldo Ramos.

Paseniño, paseniño

En Paseniño, paseniño Antonio García Teijeiro evoca a poesía de Rosalía de Castro. Esta edición, ilustrada por Marcos Viso, inclúe un CD musical con poemas recitados polo autor.

Treboada.

Chuvia tola

que os piñeiros

non os molla

porque calan,

porque arrolan.

Antonio García Teijeiro, Paseniño, paseniño

Primavera de poesía III: María Reimondez

Hoxe continuamos coa nosa "Primavera de poesía" cun poema de Galicia en bus  da escritora María Reimondez. 

En abril,

nubes de la no ceo

o verdecer das árbores

en cada letra.

María Reimondez

Día de Rosalía

Estes días podedes ver un espazo moi especial no primeiro andar do edificio de EI e EP: O Recuncho de Rosalía. Neste espazo amosanse algúns dos libros da autora, unha escolma de versos e unha cesta con rolos nos que están escritos algúns dos seus poemas para coller e ler nas aulas. 

Onte foron algúns alumnos e alumnas de 1º de ESO a lerlles aos nenos e nenas de Educación Infantil un deles. Hoxe continuamos a celebración desta data cun recital do alumnado de secundaria no recreo de mediodía. Atoparás máis información sobre este conmemoración na nosa web.

Día da Paz VII: unha cantarola de Neira Vilas

Cantarolas de Anisia Miranda e Xosé Neira Vilas é outro dos clásicos da literatura infantil galega. O libro, publicado en 1975, foi reeditado por Kalandraka nunha fermosa edición ilustrada por Leandro Lamas. Deixámosvos hoxe as dúas primeiras estrofas da "Cantarola dos nenos".

Cantarola dos nenos

Amiguiños todos,

amiguiños xa,

os nenos de aquí,

e os nenos de alá.

Os nenos do mundo

todos a cantar

a unha mesma voz

collidos das mans.

Por certo, podedes escoitar algunhas das versións musicais das "cantarolas" na web da Fundación Xosé Neira Vilas.

Día da Paz II: poesía

A poesía vai ter un lugar moi especial na nosa conmemoración do Día da Paz, por iso queremos lembrar algúns poemas ao longo desta semana neste blogue. Empezamos cun pertencente a un poemario que nos gusta moito: PAlAbrAs brAncAs de Elvira Riveiro Tobío.

Basta 

Basta

á paz maltratada,

ás trampas canallas,

ás malvadas lacras:

basta!

Basta

á fatal labazada,

ás casas arrasadas,

ás falsas fazañas:

basta!

Basta

ás mans asañadas,

ás fadas malfadadas,

ás malas malandanzas:

basta.

Basta ás amargas palabras.

Grazas! Ás palabras plantadas

nas landas da paz.

Elvira Riveiro Tobío

Exposición fondos de poesía para secundaria

Ata o vindeiro martes podedes visitar a nosa exposición de fondos de poesía para secundaria.

Libros que van chegando: Anatomía da lingua de Antón Cortizas

É tan grande esta miña

pequena e humilde lingua

que nunca chegarei 

a pronunciala enteira.

Antón Cortizas, Anatomía da lingua

Anatomía da lingua é un poemario de Antón Cortizas con ilustracións de Leandro Lamas que vén de chegar aos nosos andeis. Un libro no que a musicalidade e o ludismo se combinan harmoniosamente arredor dun único tema: a lingua.

Libros que van chegando: Soneto no alfabeto

Soneto no alfabeto é o novo poemario de Xoán Carlos Domínguez Alberte: unha homenaxe as 22 letras do alfabeto galego.

Pon e supón que o poema é un pan

que preparas con palabras puídas

que acaparas en patrias nacidas

do pensamento en semente artesán.

X.C. Domínguez Alberte, Soneto no alfabeto

Un poema de Ana Romaní

Hoxe deixámosvos un dos máis coñecidos poemas de Ana Romaní quen, como lembrabamos o pasado xoves vén de recibir o Premio Nacional de Xornalismo Cultural.

"Belas irmás, subide
ás mais firmes rochas"
EDITH SÖDERGRAN

Camiñan descalzas polas rochas,
pantasmas de sal habitan as sombras,
saben que as últimas mareas
esqueceron na praia os restos do naufraxio.
As mulleres recollen cada noite
os tesouros de auga, líquidos e fráxiles,
rebélanse contra a Historia,
constrúen co mar as estatuas
que nunca permanezan.
As mulleres de sal, con argazos de sombras,
xorden das últimas mareas
e tecen tesouros de auga cada noite
contra a Historia.
Elas, que saben que o efémero permanece.

Ana Romaní: Das últimas mareas

Parabéns para Ana Romaní

A poeta, académica da RAG e xornalista cultural Ana Romaní vén de ser galardoada co Premio Nacional de Xornalismo Cultural outorgado polo Ministerio de Cultura e Deporte.

Distrito Xermar: Ana Romaní

Moitos parabéns!

Libros que van chegando: Street Poems de Fran Alonso

Street Poems é o último libro de poesía publicado por Fran Alonso. Unha singular combinación de poesía, graffiti e poesía que nos amosa esa maneira tan peculiar e atractiva de entender a poesía do escritor vigués.

• Reseña en Caderno da Crítica.

Maio de Letras Galegas XVII: Elexías de luz

Esa lúa de prata
atopou o tesouro
que eu perdera na auga
 Mª Victoria Moreno, Elexías de luz

Elexías de luz é un poemario publicado postumamente no que se inclúen en realidade dous: o que lle dá título e outro titulado Duns folios en branco. Mª Victoria  amosa neste libro o seu coñecemento da técnica poética e a paixón pola poesía que sempre sentiu, como amosa a antoloxía Os novísimos da poesía galega que publicou en 1973.

Neste amencer de pombas indecisas

conversarei coas fontes

onde beben pesares cristalinos

as sombras que se axitan pola noite.

Mª Victoria Moreno, Elexías de luz 

Para saber máis:

• "Escaparate poético (CXIII) María Victoria Moreno no blogue Versos e Aloumiños.

Día Mundial da Poesía II: Lembrando a Xohana Torres

Xohana Torres naceu en Santiago de Compostela o 22 de novembro de 1929 e faleceu en Vigo o 12 de setembro de 2017. Xohana (quen por certo está moi ligada a Ferrol onde pasou a súa infancia e mocidade) escribiu narrativa, teatro e poesía. Cultivou tamén a literatura infantil e xuvenil en galego con obras coma Polo mar van as sardiñas e Pericles e a balea. 

 Penélope

                                                  DECLARA o Oráculo:
                                                        "QUE a banda do solpor é mar de mortos,
                                                         incerta, última luz, non terás medo.

                                                         QUE ramas de loureiro erguen rapazas.
                                                         QUE cor malva se decide o acio.

                                                         QUE acades disas patrias a vendima.
                                                         QUE amaine o vento, beberás o viño.

                                                         QUE sereas sen voz a vela embaten.
                                                         QUE un sumario de xerfa polos cons".

                                                         Así falou Penélope: 
 
                                                        "Existe a maxia e pode ser de todos.
                                                         ¿A que tanto novelo e tanta historia?

                                                                             EU TAMEN NAVEGAR"

Xohana Torres, Tempo de ría 

• Xohana Torres na Biblioteca Virtual Galega. 
•  Xohana torres no Álbum de mulleres.

Mil grazas Dores

Un ano máis e grazas á colaboración da Biblioteca Pública Municipal a poeta Dores Tembrás estivo entre nós o pasado 8 de febreiro para impartir dous obradoiros de poesía: una para o alumnado de 6º de EP e outro para o de 2º de ESO.

cartografía de palabras
repetir cada signo
dentro da cuadrícula
papel en branco
pozo infindo
as palabras esvaran
por iso sempre cuadrículas
para salvalas
pequenas casas
onde vivir para sempre

Dores Tembrás

Asistir a un obradoiro de Dores é emocionarse e vivir a poesía, saber que esta é o cerne da nosa vida e que está aí tan presente... Aínda que non nos decatemos. Mil grazas Dores, por lembrárnolo e mil grazas á bibliotecaria municipal por colaborar con nós coma sempre!

• Máis información sobre os obradoiros.
• Web de Dores Tembrás.