Guías de suxestións de lectura para o Nadal

Xa están na nosa web as guías de suxestións para Educación Infantil, Educación Primaria e ESO:

http://issuu.com/bibliosansa/docs/gu_a_de_nadal_2012-infantil

http://issuu.com/bibliosansa/docs/guia_de_nadal_2012-primaria

 http://issuu.com/sansaliber/docs/guianadal

Bo Nadal.

Guía de suxestións de lectura "Mulleres e ciencia"

Xa podes atopar na nosa web a guía de lectura sobre "Mulleres e ciencia".

III DÍA DA CIENCIA E A TECNOLOXÍA EN GALEGO

Este ano no Día da Ciencia e a Tecnoloxía en Galego homenaxeamos a Leonardo da Vinci e Ramón Verea. Dende a biblioteca querémonos sumar a este conmemoración presentándovos unha das nosas novidades: o libro Leonardo da Vinci de Steve Augarde (publicado na editorial Baía) que che permitirá achegarte á obra do xenial inventor a través do diario de Paulo o cal con só dez anos se converte en aprendiz deste.

Aquí atoparás as actividades desenvolvidas nos diversos centros de ensino para esta efeméride.

Bases do concurso "Investigación e ciencia"

Na nosa páxina web atoparás as bases para este concurso, no que poden participar os alumnos da ESO do noso centro. Anímate e participa.

Guía de suxestións para a ESO

Se desexas coñecer as nosas suxestións para o verán, atoparalas na web do noso centro.

Lembrando a Valentín Paz Andrade

A orientación da súa vida e da súa obra eran o ter a Galiza como tarefa, que é o título dun dos seus libros fundamentais.

Isaac Díaz Pardo

Este ano o Día das Letras Galegas está dedicado a Valentín Paz Andrade. Paz Andrade, que naceu en Lérez (Pontevedra) en 1898 e morreu en Vigo en 1987, foi avogado, escritor, poeta, empresario e xornalista.

É autor dunha prolífica obra ensaística en castelán e galego na que figuran títulos coma A galeguicidade na obra de Guimarães Rosa (1978) e Castelao na luz e na sombra (1982). A poesía tamén foi outra das súas dedicacións dende que en 1954 publicou Pranto Matricial, poemario elexíaco dedicado a Castelao.

Se desexas saber máis sobre a súa biografía e obra, aquí atoparás actividades e materiais elaborados por diversos centros educativos para lembrar a súa figura. Nós rematamos esta breve lembranza con estas palabras do escritor Manuel Rivas dedicadas ao escritor homenaxeado neste 17 de maio:

“Cada un dos seus pasos estaba tinguido de compromiso, Galicia para el era unha utopía realizable”.

Lendo a Celso Emilio no IES Fontem Albei

Unha orixinal proposta para o Día do Libro realizada no IES Fontem Albei da Fonsagrada.

Nicanor Parra e antipoesía

Onte, 23 de abril, o neto do poeta Nicanor Parra recibiu en nome do seu avó o Premio Cervantes.

Nicanor Parra, que naceu en Chile o 5 de setembro de 1914, é o maior da Familia Parra, da que tamén formaron e forman parte coñecidos artistas e músicos entre os que figura a cantautora e folclorista Violeta Parra.

En 1954 publicou Poemas e Antipoemas que se considera o libro que inaugura a antipoesía. Unha poesía na que a realidade é mirada dende o humor e a ironía.

La poesía chilena se endecasilabó
¿Quién la desendecasilabará?
El gran desendecasilabador
Nicanor Parra

Visita de Gonzalo Moure

O pasado 26 de marzo visitounos o escritor Gonzalo Moure. Como xa sabedes,

Gonzalo Moure naceu en Valencia no ano 1951, aínda que na actualidade reside en Asturias. Estudou Ciencias Políticas na Universidade Complutense de Madrid e traballou coma xornalista fundamentalmente na radio.

En 1991 publicou a súa primeira novela, Geranium, que foi incluída na Lista de Honra do IBBY. Dende aquela obtivo numerosos premios polas súas obras de literatura infantil e xuvenil coma o Premio Barco de Vapor por Lili Libertad, o premio Ala Delta por Maíto Panduro, o Premio Gran Angular por El síndrome de Mozart, etc..

Cómpre destacar tamén, que é un dos principais impulsores do proxecto Bubisher, o bibliobús que percorre as escolas dos campamentos de refuxiados do Sáhara.

Aquí atoparedes máis sobre a súa visita.

Día Mundial da Auga: 22 de marzo de 2012

A biblioteca do noso centro súmase a esta celebración cunha selección de libros sobre a auga que atoparás na nosa web.

Día da Poesía. Lembrando a Wislawa Szymborska

“Só as preguntas un pouco inxenuas son verdadeiramente profundas”

Hoxe é o Día Mundial da Poesía e nos querémosllo dedicar á poeta polaca Wislawa Szymborska, recentemente falecida.

Wislawa Szymborska naceu en Kórnik o 2 de xullo de 1923 e finou en Cracovia o 1 de febreiro de 2012. En 1931 trasladouse coa súa familia a Cracovia, cidade na que residiu ata a súa morte. Foi poeta, ensaísta e tradutora. Entre os numerosos premios que recibiu figura o Nobel de Literatura que lle foi concedido en 1996.

A súa poesía, revestida polo común dunha sutil ironía, reflexiona sobre o paso do tempo, o amor, a dor, a morte... En fin, sobre os eternos temas da poesía presentados coa sinxeleza que só unha poeta da súa altura pode acadar.

Se queres achegarte á obra da poeta polaca recomendámosche os seguintes libros: El gran número. Fin y principio y otros poemas publicado por Ediciones Hiperión e Versos escollidos que vén de publicar Edicions Positivas. Nós, para rematar escollemos a primeira estrofa do famoso poema “Nada dúas veces” na tradución que Lucía Caeiro realizou para o segundo libro amentado:

Nada sucede dúas veces

nin vai suceder. Por iso

sen experiencia nacemos

e sen práctica morremos.

Aquí atoparás máis información sobre as actividades que as bibliotecas escolares están a desenvolver.

Día Internacional da Muller

Ao longo desta semana e da vindeira continuaremos coa exposición na biblioteca dos libros elixidos para conmemorar esta data.

Por certo, a foto escollida para ilustrar esta entrada reproduce o traballo dunha das nosas alumnas de 3º de ESO sobre mulleres escritoras. Atoparás nel a Christine de Pisan, Jane Austen, Rosalía de Castro, Emilia Pardo Bazán e Wislawa Szymborska.

Aquí atoparas actividades e materiais realizadas por outras bibliotecas escolares para conmemorar este día.

O tendal da poesía

Xa está listo o noso "tendal da poesía". Algúns alumnos optaron por copiar os seus poemas de amor preferidos mentres outros preferiron crear o seu. Grazas a todos os que participastes.
Por certo, aquí podedes atopar as actividades e propostas doutros centros.



http://www.edu.xunta.es/biblioteca/blog/?q=node/429

Recital poético do Día Escolar pola Paz

Despois dunha semana de ensaios durante os recreos na biblioteca, hoxe chegou o día do recital. Dende aquí, queremos agradecer aos alumnos e alumnas que recitaron os versos de Celso Emilio Ferreiro, Nicolás Guillén, Ángel González, Ángela Figuera Aymerich e María Wine. Grazas polo recital e grazas por converter durante a pasada semana a biblioteca nun espazo poético. Porque, ao cabo, tal e coma escribiu Gabriel Celaya, "La poesía es un arma cargada de futuro".

 

Aquí atoparás as nosas guías de suxestións do curso pasado:
http://centros.edu.xunta.es/cpidesansadurnino/web/IMG/pdf_tripticopazfinal.pdf
 http://centros.edu.xunta.es/cpidesansadurnino/web/IMG/pdf_GUIA_PAZ_2011.pdf

E aquí, unha recompilación de guías e propostas realizadas por outros centros escolares:
http://www.edu.xunta.es/biblioteca/blog/?q=node/424

IN MEMORIAM ISAAC DÍAZ PARDO

O 5 de xaneiro deste novo ano tróuxonos unha triste nova: a morte de Isaac Díaz Pardo aos noventa e un anos. Isaac Díaz Pardo foi pintor, editor, escritor, empresario e incansable promotor e mecenas de numerosos proxectos culturais.

Sit tibi terra levis